آنه بلياك كلبي اشما يدك يبرد

ياباب الفرح والحزن مد الشوف
خايف لا يهب عالي الهوىوتنسد

يا اسود رمش هنيال لون الليل
لانه وي عينك دووووم يتودد

فضلك عالحسن وانته اخر العنكود
وبستان الورد لولاك ما ورد

يلزفه عرس ضحكتك تالي الليل
ويا عين الصكر بالزعل من تحتد

عودني اعله بعدك وانته ابو الطيبات
بلكي اعلى الصبر يمعود اتعود

ويالكلك اشوصف بيك؟ واشعدد؟

اشو لا مو حلو وما تشبه الغزلان
ولاريح القرنفل بيك لو ورد

ولا عينك مسافه وبسمتك سلوان
ولا كل اليشوفك تمر يتحدد

ولا الله ابتلاني واخالط الجيلين
ولا عمري اعله شربهة ماي يتفرهد

ولا تزهي ابشبابك ماخذك طغيان
ولا انت العزيز البيك بس اركد

ولا غاوي ولذيذ وتشبه النعناع
طيبه وطيبتك كل يوم تتجدد

ولاطولك مصيبه ومثل كل الناس
حسنك موقبي وخدك مثل كل خد

يا اسهل من اسمي وصعب حد الغيض
وطلاسم لو ردت وياي تتشدد

صدكني احبك حب غريب الطور
واحب صبرك عليه وما كلت لاحد..

عريان السيد خلف